Macem-Maceme Tembung Rangkep Lan Contone

Tembung rangkep yaiku tembung kang wanda utawa linggane karangkep (ditulis utawa diunekake kaping pindho). Tembung rangkep kabedakake dadi telung werna:

• 1. Tembung rangkep dwilingga

a. Dwilingga padha swara

Diarani dwilingga padha swara amarga linggane diucapake ping pindho.
Contone: buku-buku, meja-meja, kursi-kursi, omah-omah.

b. Dwilingga salin swara

Dwilingga kang swarane wis ganti/malih. Contone: bola-bali, mloya-mlayu, mloka-mlaku, wira-wiri.

c. Dwilingga semu
Uga diarani dwilingga murni, amarga tembung-tembung mau ora ana linggane.
Contone: orong-orong, kupu-kupu, ondhe-ondhe, angga-angga.

• 2. Tembung rangkep dwipurwa

Yaiku tembung kang dirangkep wanda ana ing ngarep dhewe.

Contone: leluhur, tetamba, tetuku, jejamu.

• 3. Tembung rangkep dwiwasana

Yaiku tembung kang dirangkep wanda ana ing mburi dhewe.

Contone: cekikik, cengenges, cethethet.